31 December 2018

આપણે મળ્યા નથી તોયે સાદ પાડીનેય બોલાવે તું ,મુકુલ દવે 'ચાતક'

આપણે  મળ્યા  નથી  તોયે  સાદ પાડીનેય  બોલાવે તું
આપણા  સંબંધની  નક્કી  કડી  હશે  એથી  તડપાવે તું
મૌન   સાથે  મૌન  ભીતરમાં  જયારે  વાત  કરતું   હોય
ત્યાં હૃદયની વાત છાની રહે નહીં આંખોથી સમજાવે તું
મુકુલ દવે 'ચાતક'

આમ ટોળે વળી રણમાં રહે ઊભા કૈક રંધાતું હશે ,મુકુલ દવે 'ચાતક'

આમ   ટોળે    વળી   રણમાં   રહે   ઊભા  કૈક રંધાતું  હશે
ખેલ  કુદરતનો  ગજબ  છે  રહસ્યોથી   કૈક  શીખાતું   હશે
આજ રોક્કળ રેત મહીં એકદમ ક્યાંથી આ તરફ ઊઠી હશે
આજે તરસ જળને નક્કી લાગી હશે  મૃગજળ પીવાતું હશે
મુકુલ દવે 'ચાતક'

28 December 2018

આ પ્રેમ છે નાહક તું મુજનેએ દઝાડવા મથેમુકુલ દવે 'ચાતક',

આ પ્રેમ છે નાહક  તું  મુજનેએ  દઝાડવા  મથે
હું  લીન  છું  તુજમાં ક્યાં મુજને  જગાડવા મથે
આ પ્રેમ છે અંદર ઊગે, વિકસે અને મ્હોરે ભલા
કોણ એવું છે અંદર મ્હોરી મુજને ઉગાડવા મથે
મુકુલ દવે 'ચાતક'


25 December 2018

તારેજ ખુદ અજ્વાળું તો પ્રગટાવવું પડે,મુકુલ દવે 'ચાતક'

તારેજ   ખુદ  અજ્વાળું  તો  પ્રગટાવવું   પડે
ચાહે   ભલે  તારે  અંદર  તેલ  બાળવવું  પડે
ઈશ્વર ભલેને મૂર્તિમાં શણગારેલો હોય તો શું
ઈશ્વરે   જ્યોતને  પામવા   ઊંડે  આવવું  પડે
મુકુલ દવે 'ચાતક'

કાલ જેવું આજનું વાતાવરણ પણ નથી ,મુકુલ દવે 'ચાતક'

કાલ    જેવું    આજનું   વાતાવરણ    પણ   નથી
છે   સમન્દર  પણ  તરસનું   કોઈ   કારણ   નથી
આભડ્યો     છે   શાપ    હડહડતાય    કળયુગનો
તૃપ્તિ દેનારું એને શું આભે વાદળનું ભારણ નથી
મુકુલ દવે 'ચાતક'

21 December 2018

તારા નયનોની અણઉકેલી એ છબી હું જ છું.મુકુલ દવે 'ચાતક'

તારા નયનોની અણઉકેલી એ છબી હું જ છું
અગમનિગમના રહસ્યોની એ કડી  હું  જ છું
મારા  બધા  ચ્હેરા પરાયા તો નથી ને  છતાં
અગ્નિસાક્ષીએ  ભુલાયો  એ  ઘડી   હું  જ  છું
મુકુલ દવે 'ચાતક'

બસ ક્યારે પહોંચશે માધવ અમારો સંઘ તારે દ્વારે,મુકુલ દવે 'ચાતક'

બસ   ક્યારે   પહોંચશે   માધવ   અમારો  સંઘ   તારે  દ્વારે
છે અમારો પગ અડધો સાંકળમાં,પહોંચીશું  કેમ તારે  દ્વારે
રાહમાં   ઉત્સવ   ઉજવ્યા   ધૂળમાં  ભૂંસાતા  ગયા  પગલાં
છે તૃપ્તિ છિપાવું તરસ આ છળમાં,પહોંચીશું કેમ તારે દ્વારે
મુકુલ દવે 'ચાતક'

12 December 2018

આ સમયના ભ્રમમાંથી ખુદને પણ જગાડી જોઈ લે,મુકુલ દવે 'ચાતક'

આ   સમયના  ભ્રમમાંથી   ખુદને  પણ  જગાડી  જોઈ  લે
આમ   ભીતરનાય   બીજા   માનવીને   હટાવી   જોઈ  લે

એ  શક્ય  છે  સાચના એ  કિલ્લાને તોડવા તત્પર તું હોય
એ  પ્હેલાં  પિંજરમાંથી  મોહનું   પારેવું  ઉડાડી  જોઈ   લે

ખુબ  અઘરું  છે  અહીં  માણસ થઈને પણ રહેવાનું  મિત્રો
બસ તું અંદરનાંય માણસને ન્હોર તત્પર ભરાવી જોઈ લે

સાવ  ડગમગતા  શ્વાસોનોય  ટેકો  ઉછીનો  લેવા જાય તું
તો  ક્ષણોને  પાર  કરવા  તું  સિક્કાઓને  ઉછાળી જોઈ લે

ડૂસકાંઓ તું ભરે તો પણ કમી નથી આંસુઓની અંત સુધી
તું  સમયની  ધૂપ  ખંખેરી  દરેક  પળને  રમાડી  જોઈ  લે

મુકુલ દવે 'ચાતક'

6 December 2018

પ્રેમ જેવું હોય તો પાંપણના એ પલકારનું કારણ હશે,મુકુલ દવે 'ચાતક'

પ્રેમ  જેવું  હોય તો પાંપણના એ પલકારનું  કારણ  હશે
જો  તું  એને  પામવા ચાહે  તો કેવળ એમનું કામણ હશે
સઁબઁધોના  વેશમાં  મળે નામ એ પડનો અર્થ તું  શોધજે
આ હયાતીના ખેલમાં કુદરતના ઈશારાનું જાગરણ હશે
મુકુલ દવે 'ચાતક'

3 December 2018

આગમનમાં આંખ ઢાળી દ્વાર પાછાં મેં ઉઘાડી નાખ્યા,મુકુલ દવે 'ચાતક'

આગમનમાં  આંખ  ઢાળ,  દ્વાર  પાછાં  મેં  ઉઘાડી  નાખ્યા
આંખની પાંપણે મિલનના એ સ્વપ્નોને મેં સજાવી નાખ્યા
ને  પવન  એવો  ફૂંકાયો  કે  સૂરજ  સામે  લડી  બેઠા  અમે
રાતની  એ  ઝંખનાઓને  સિક્કાની  જેમ  ઉછાળી  નાખ્યા
મુકુલ દવે 'ચાતક'