24 January 2020

હૃદયના મંદિરના બારણાં જરાક ખોલી નાખ ,મુકુલ દવે 'ચાતક

હૃદયના  મંદિરના  બારણાં  જરાક  ખોલી  નાખ
પ્રથમ  દીવો  પ્રગટાવી  મારું  નામ  બોલી નાખ

કરી  લે  હૈયામાં  ડોકિયું  તુજને  દેખાશે  વરસાદ
અશ્રુ   શું   શું   લખે   પ્હેલાં   જખ્મો  ઘોળી  નાખ

ખભા    પર   મૂક્યો   છે    હાથ   મેં    એ    કારણે
સફરનો  થાક  લાગે  નહિ  અબોલા  તોડી  નાખ

તને જોઈ મૌનની વાચાએ રસમ બદલી પણ છે
શબ્દો   હોઠે   લથડે   પ્હેલાં   શબ્દો  જોખી  નાખ

કંડાર્યો   મેં   હતો   ખુદ   માર્ગ   તો  તારા  ઘરથી
ફૂટ્યાં   માર્ગ   ઘણાં   મળુ  તો  ક્યાંક  રોકી  નાખ
મુકુલ દવે 'ચાતક'

21 January 2020

તમારી આંખનો પ્યાલો હું પીતા પી ગયો છું ,મુકુલ દવે 'ચાતક '

તમારી   આંખનો   પ્યાલો   હું   પીતા   પી  ગયો  છું
તમારા    કેફની    ઉષ્મા    વિના    થીજી    ગયો   છું

છલકવું   હોયતો   ભીંજાઈને   તમે   આવીને  વરસો
હું    પાંપણની    બધી    ભીનાશને   ભૂલી   ગયો   છું

હવાના  સૂસવાટે  જ્યાં  તમારી  લટ  ગાલે  અડે   છે
ત્યારથી  જીદે  ચઢેલી ઈચ્છા પંપાળી બહેકી ગયો છું

શ્વાસની     ઉષ્માનો     કેફ      શરીરે      ચાખ્યો     છે
ત્યારથી   શ્વાસની   વેઠી   અડચણો   તૂટી   ગયો   છું

કહું    છું    વાત   આખી   સાંભળો    મારી    ધ્યાનથી
હું દિનરાત છેતરી મુજને એક જિન્દગી જીવી ગયો છું

મુકુલ દવે 'ચાતક '


16 January 2020

રમતમાં તું અશ્રુ સાથે જરા મસ્તી કરી લે ,મુકુલ દવે 'ચાતક'

રમતમાં   તું   અશ્રુ   સાથે   જરા   મસ્તી  કરી  લે
પછી   તું   આંસુ   લૂછી  ઓઢણી  સરખી  કરી  લે

તડકો  પણ  ભરબપોરે  આજ બસ જીદે ચઢ્યો છે
તારું  ઘર  શોધતા પણ ઝાંઝવા ગુસ્તાખી કરી લે

તું   મહેક   છે   તને   તો   કોણ  રોકી  પણ શકે છે
ભ્રમરા  નાચવા  મંડી  પડ્યા  મઘમઘતી  કરી લે

ચ્હેરો  ક્યાંથી  ઉછીનો  લાવવો  જખ્મો  સંતાડવા
મળી  ભેગા  દુવા  માંગીએ  ભેગી સામગ્રી કરી લે

મને બસ હાર કે જીતની ગતાગમ કોઈ પણ નથી
તને  પ્રેમ  છે  તો  રમવાનું  પ્રથમ  નક્કી  કરી લે
મુકુલ દવે 'ચાતક'

8 January 2020

ક્યાં સુધી છુપાવું લાગણી ,પ્રેમનો છું હું બીમાર પાછા આવો,મુકુલ દવે 'ચાતક '

ક્યાં   સુધી   છુપાવું   લાગણી ,  પ્રેમનો   છું   હું   બીમાર  પાછા  આવો
તમે  છો  આ  ધરા  પર  કે  ગગનમાં,  રઝળશે મુજ પ્યાર પાછા આવો

વિખેરીને      દરેક     બંધન     હું    ઊભો    છું    તમારા   અંતર્ધ્યાનમાં
ગયો  હું  મંદિર, મસ્જિદ  ને  ગુરુદ્વાર,  પ્રેમ  છે  નિરાકાર  પાછા   આવો

તમે   નિઃસહાય   છોડીને   ગયા   મુજને   ઘણા   ભીડથી   ભર્યા    રસ્તે
સમજે છે એ મને ગુનેગાર,તોયે આપું હું ખુલાસા લગાતાર પાછા આવો

ઝઝૂમ્યા   તોય   ના   ઊડી   શકાયું   ગગને,  છતાં   ઝૂકી   ગયો   છું   હું
આવી  ખખડાવો  ઘરના  દ્વાર, નહીંતો  હું  થઈશ  નિરાધાર પાછા આવો

કહે   એ   તારી   હું   પણ   છું,  હું કહું  છું તારી તું પણ છે,આમ વિહવળ હું
સમજની   બહાર   છે   તારા   ઈશારા,  તોય   છે   ધારદાર  પાછા આવો
મુકુલ દવે 'ચાતક '